दोन पोलीस कुटुंबांवर दुःखाचा डोंगर ; पोलिस अधीक्षक धिवरेंनी दिला भावनिक आधार
जळगाव – जळगावचे पोलीस अधीक्षक श्रीकांत धिवरे यांनी गेल्या महिन्यात अपघाती मृत्यूमुळे दुःखात बुडालेल्या दोन पोलीस कुटुंबीयांची भेट घेऊन सांत्वन केले. या भेटीतून त्यांनी केवळ वरिष्ठ अधिकारी म्हणून नव्हे, तर पोलीस कुटुंबाचा प्रमुख म्हणून आपली जबाबदारी पार पाडली.
भुसावळ परिसरातील दोन पोलीस कुटुंबांवर सप्टेंबर महिन्यात दुःखाचा डोंगर कोसळला. पहिल्या घटनेत निवृत्त सहायक फौजदार प्रकाश आनंदा पाचपांडे यांचा १ सप्टेंबर रोजी दुचाकी अपघातात मृत्यू झाला. त्यांच्या निधनामुळे कुटुंबीयांना मोठा धक्का बसला.
दुसऱ्या घटनेत भुसावळ बाजारपेठ पोलीस ठाण्यात कार्यरत सहायक फौजदार विजय नेरकर यांच्या मुलाचा दुचाकी अपघातात मृत्यू झाला. डॉ. रोहित नेरकर हा गुजरातमध्ये एमबीबीएसच्या अंतिम वर्षात शिक्षण घेत होता. २१ सप्टेंबर रोजी झालेल्या अपघातात त्याचा मृत्यू झाला. वैद्यकीय शिक्षण पूर्ण करून डॉक्टर होण्याच्या उंबरठ्यावर असलेल्या मुलाच्या निधनाने नेरकर कुटुंबीयांवर दुःखाचा डोंगर कोसळला.
दुःखाच्या प्रसंगी एसपींची सांत्वनपर भेट
या दोन्ही घटनांची दखल घेत पोलीस अधीक्षक श्रीकांत धिवरे यांनी ४ ऑक्टोबर रोजी संबंधित कुटुंबीयांची भेट घेतली. प्रकाश पाचपांडे यांच्या पत्नी शैला पाचपांडे (निवृत्त उपनिरीक्षक) तसेच त्यांच्या दोन मुलांशी संवाद साधत त्यांनी कुटुंबीयांचे सांत्वन केले आणि परिस्थितीची माहिती जाणून घेतली.
त्यानंतर विजय नेरकर यांच्या कुटुंबीयांचीही भेट घेऊन त्यांनी शोकसंवेदना व्यक्त केल्या. या कठीण काळात पोलीस दल त्यांच्या पाठीशी असल्याची जाणीव करून देण्याचा प्रयत्न या भेटीतून झाला.
कर्तव्याच्या पलीकडे जपली माणुसकी
पोलीस दलात काम करताना अधिकारी आणि कर्मचाऱ्यांना अनेकदा स्वतःच्या कुटुंबासाठी पुरेसा वेळ देता येत नाही. सण-उत्सव असोत किंवा कौटुंबिक कार्यक्रम, कायदा व सुव्यवस्था राखण्याच्या जबाबदारीमुळे अनेकदा कर्तव्यालाच प्राधान्य द्यावे लागते. मनुष्यबळाची कमतरता आणि कामाचा वाढता ताण यामुळे कर्मचाऱ्यांच्या वैयक्तिक आयुष्यावरही परिणाम होतो.
अशा परिस्थितीत कर्मचाऱ्यांच्या सेवा-सुविधांसोबतच त्यांच्या कौटुंबिक अडचणी आणि भावनिक गरजांची जाणीव ठेवणे महत्त्वाचे ठरते. वरिष्ठ अधिकाऱ्यांनी कर्मचाऱ्यांच्या सुख-दुःखात सहभागी होणे, त्यांना धीर देणे आणि अडचणीच्या काळात आधार देणे यामुळे पोलीस दलातील परस्पर विश्वास अधिक दृढ होतो.
पोलीस अधीक्षक श्रीकांत धिवरे हे पोलीस कुटुंबीयांसोबतच सामान्य नागरिकांच्या अडचणींकडेही लक्ष देत असल्याचे नमूद केले जाते. उन्हात काम करणारे कष्टकरी, भाजीविक्रेते आणि फेरीवाले यांच्या अडचणींची जाणीव ठेवून त्यांना दिलासा मिळावा, यासाठी प्रयत्न करण्याची त्यांची भूमिका चर्चेत असते.
गेल्या महिन्यात दोन पोलीस कुटुंबांवर ओढवलेल्या संकटाच्या वेळी धिवरे यांनी स्वतः भेट देऊन सांत्वन केले. या भेटींमुळे दुःख कमी होऊ शकत नसले, तरी अशा कठीण प्रसंगी आपले सहकारी आणि संपूर्ण पोलीस दल आपल्या पाठीशी उभे आहे, ही भावना कुटुंबीयांसाठी महत्त्वाची ठरते.
कर्तव्य, शिस्त आणि कायदा-सुव्यवस्थेच्या जबाबदारीसोबतच सहकाऱ्यांच्या दुःखात सहभागी होण्याची ही भूमिका पोलीस दलातील माणुसकीचे दर्शन घडवणारी आहे.
