फुटबॉल क्षेत्रातील उल्लेखनीय कार्याची राज्यस्तरावर दखल फारुख शेख यांना २५-२६  ‘वीफा चा विशेष मान्यता पुरस्कार

जळगाव : जळगाव जिल्ह्यात फुटबॉलच्या विकासासाठी सातत्याने केलेल्या उल्लेखनीय कार्याची राज्यस्तरावर दखल घेण्यात आली असून, जळगाव जिल्हा फुटबॉल संघटनेचे सचिव फारुख शेख यांना सन २०२५-२६ चा ‘विफा स्पेशल रिकगनेशन अवार्ड* (विशेष मान्यता पुरस्कार’) प्रदान करण्यात आला.

महाराष्ट्रातील फुटबॉलच्या विकासासाठी कार्यरत असलेल्या वेस्टर्न इंडिया फुटबॉल असोसिएशन अर्थात विफा यांच्या वतीने दरवर्षी फुटबॉल क्षेत्रात उल्लेखनीय योगदान देणाऱ्या व्यक्तींचा सन्मान करण्यात येतो. यंदाचा विशेष मान्यता पुरस्कार जळगाव फुटबॉल असो चे सचिव  फारुख शेख यांना वैयक्तिक स्वरूपात प्रदान करण्यात आला आहे.

पुरस्काराच्या प्रमाणपत्रावर नमूद करण्यात आले आहे की, राज्य आणि जिल्ह्यात फुटबॉलच्या विकासासाठी केलेल्या उल्लेखनीय योगदानाबद्दल श्री. फारुख शेख यांना सन २०२५-२६ चा विशेष मान्यता पुरस्कार प्रदान करण्यात येत आहे.

१६ ऑक्टोबर रोजी मुंबई येथील कुपरेज फुटबॉल मैदानावर झालेल्या पुरस्कार सोहळ्यात विफा अध्यक्ष तथा खासदार प्रफुल्ल पटेल यांच्या हस्ते फारुख शेख यांना शाल,तर वरिष्ठ उपाध्यक्ष हरीश होरा चे हस्ते प्रमाण पत्र, माजी मंत्री व आमदार विश्वजित कदम चे हस्ते स्मृती चिन्ह व माजी आमदार मालोजीराव छत्रपती यांच्या हस्ते चषक  प्रदान करण्यात आले. त्यावेळी उपाध्यक्ष माजी आमदार सुनील धांडे,सचिव प्रो.डॉ. किरण चौगुले व खजिनदार सलीम परकोटे यांची उपस्थिती होती.

फारुख शेख यांनी जळगाव जिल्ह्यात फुटबॉल संघटनेचे कार्य अधिक व्यापक करताना खेळाडूंच्या विकासाला प्रोत्साहन, मुला-मुलींच्या स्पर्धांचे आयोजन, शालेय फुटबॉलला चालना, जिल्हास्तरीय व राज्यस्तरीय स्पर्धांचे नियोजन तसेच नवोदित खेळाडूंना संधी उपलब्ध करून देण्यासाठी सातत्याने कार्य केले आहे.

त्यांच्या या कार्याची राज्यातील फुटबॉलची सर्वोच्च अधिकृत संघटना असलेल्या विफा कडून वैयक्तिक पुरस्काराद्वारे घेतलेली दखल ही जळगावच्या फुटबॉल क्षेत्रासाठी अभिमानाची बाब मानली जात आहे.

या पुरस्कारामुळे जळगाव जिल्ह्यातील फुटबॉल खेळाडू, प्रशिक्षक, पंच, शालेय क्रीडा क्षेत्रातील शिक्षक व संघटक यांना निश्चितच प्रोत्साहन मिळणार असून, जिल्ह्यातील फुटबॉल विकासाची वाटचाल अधिक वेगाने करण्याचा संकल्प यानिमित्ताने व्यक्त करण्यात आला.

फारुख शेख यांच्या या सन्मानाबद्दल फुटबॉल संघटनेचे आश्रयदाते? अशोक भाऊ जैन, अतुल भाऊ जैन ,अध्यक्ष डॉ उल्हास पाटील सह जळगाव जिल्हा फुटबॉल संघटनेचे पदाधिकारी, खेळाडू, प्रशिक्षक, पंच, क्रीडा क्षेत्रातील मान्यवर आणि एकता संघटना व फुटबॉल प्रेमींकडून त्यांचे अभिनंदन करण्यात येत आहे.

फोटो कॅप्शन —   फारूक शेख यांचा गौरव करताना प्रफुल भाई पटेल, मालोजी राव छत्रपती, हरीश वोरा, विश्वजीत कदम,सुनील धांडे ,प्रो किरण चौगुले आदी दिसत आहे