जळगाव. दुष्काळी परिस्थिती लक्षात घेता नागरिकांच्या पिण्याच्या पाण्याचा लावाला सर्वोच्च प्राधान्य देतानाच शेतकऱ्यांच्या पिकांचे संरक्षण करणेही तितकेच महत्त्वाचे आहे, त्यामुळे आगामी उन्हाळ्याच्या पार्श्वभूमीवर पिण्याच्या पाण्याचा आवश्यक साठा सुरक्षित ठेवून गिरणा प्रकल्पातून पिण्याच्या पाण्यासाठी व औद्योगिक वापरासाठी तीन विरगसिंचन आवर्तने, तर शेतकऱ्यांच्या हितासाठी एक सिंचन आवर्तन सोडण्याचे नियोजन करावे, असे निर्देश पालकमंत्री गुलाबराव पाटील व जलसंपदामंत्री गिरीश महाजन यांनी जलसंपदा विभागाच्या अधिकाऱ्यांना दिले.
गिरणा कालव्याच्या माध्यमातून अधिकाधिक शेतकऱ्यांना सिंचनाचा लाभ मिळण्यासाठी पाणी वितरण व्यवस्था सक्षम करणे आवश्यक असल्याचे सांगत पालकमंत्री गुलाबराव पाटील यांनी कालव्यावरील सर्व पाटचाऱ्या व वितरिकांची पाहणी करून आवश्यक दुरुस्तीचे प्रस्ताव तात्काळ सादर करण्याचे निर्देश दिले. पाण्याची गळती व नासाडी रोखून शेवटाच्या टोकावरील शेतकऱ्यांपर्यंत पाणी पोहोचले पाहिजे. सिंचन व्यवस्थेच्या बळकटीकरणासाठी सुरू असलेली कामे दर्जेदार व निर्धारित मुदतीत पूर्ण करावीत. जिल्हाधिकारी व संबंधित अभियंत्यांनी कामांची नियमित पाहणी करून गुणवत्तेवर नियंत्रण ठेवावे. कामात विनाकारण विलंब किंवा त्रुटी आढळल्यास संबंधितांची जबाबदारी निश्चित करावी, असे स्पष्ट निर्देशही त्यांनी दिले. या बैठकीस ना. संजय सावकारे, आ. नंदकिशोर महाजन, आ. अमोल पाटील, आ. किशोर पाटील, आ. राम भदाणे, जिल्हाधिकारी रोहन घुगे, उपस्थित होते.
शेतकऱ्यांचा संभ्रम दूर
गेल्या अनेक दिवसांपासून गिरणा परिसरातील शेतकरी शासनाच्या निर्णयाची वाट पाहत होते. गिरणा धरणातून आवर्तन सुटणार की नाही, याबाबत शंकांका असल्यामुळे हंगामाच्या पूर्व तयारीची मेहनत वाया जाईल की, काय? अशी स्थिती निर्माण झालेली असताना याबाबत त्वरीत निर्णय घेण्याची मागणी जिल्हाधिकाऱ्यांकडे करण्यात आली होती, त्यानुसार जलसंपदा मंत्री ना. गिरीश महाजन व पालकमंत्री गुलाबराव पाटील यांनी शुक्रवारी सर्व लोकप्रतिनिधी व प्रशासनातील अधिकाऱ्यांसोबत बैठक घेत कृषीसाठी एक आवर्तन सोडण्याचा निर्णय घेतल्याने शेतकऱ्यांमध्ये असलेला संभ्रम दूर झालेला असून, एका आवर्तनावर देखील काही पिकांचा हंगाम येण्याची शक्यता आहे.